شو صعبة هل كلمة بهيك بلد لما تسمع ولد عم يقول انا بدي … بس ما فيك تأمّن شي من اللي بدّو ياه ..
شو صعبة لما تسمع طفلة صغيرة عم تقول أنا (بعت لعبتي ب 40 ألف) كرمال جيب الدواء لخييي…
شو صعبة لما تشوف إم عم تزيد كمية المي مع الحليب كرمال علبة الحليب تأدي (تكفي) ابنها لأنه ببلدنا صعب تأمن حليب للأطفال .. وإذا أمنت بدّك تحط المعاش ـــــــــ اللي ما عاش ــــــــــ كرمال علبة أو علبتين ..
شو صعبة نشوف البيّ والإم عم يشتغلوا ليل ونهار .. ليقدروا يأمنو لقمة العيش وما عم يقدروا يأمنو كل شي لولادهم ….
وبيوقف الحكي لما تشوف صبي صغير وقّف تعليمه يلي هو أبسط حقوقه منشان يشتغل و يجيب مصاري .. ولو بتعرفوا ليه؟! ليدفع لاشتراك الكهربا كرمال الأوكسجين لبيو … حتى ما يوقف الاشتراك و يموت البيّ ..
بيوقف الحكي لما تشوف هالطفل و خايف يرجع على المدرسة كرمال بيه ما يموت و يغيب عنن…
شو بدنا أصعب من هيك مواقف بتبكّي دم بدل الدموع …
شو بدنا بعد يصير أكتر من هالأوجاع اللي عم تصير ليفيقوا النايمين أو لتهتز ضمائر الحاكمين …
كل قصّة وراها غصّة .. وبعدن الوزراء والنواب بيختلفوا عالحكم وعالتوزيع الطائفي … ومسكرين دينيهم وعيونهم هني ومتربعين عالكراسي ..
آه يا بلدنا… 💔
